ကျနော်နှင့်အိပ်မက်များ

ကျနော်နှင့်အိပ်မက်များ

စကားချီး

ဒါက ကဗျာမဟုတ်ပါဘူး။
အိပ်မက်နှင့်ပတ်သက်ပြီး ကျနော်စိတ်ဝင်စားမိသလို အင်တာနက်မှာ ရှာဖတ်မိတာလေးတွေကို ပြန်စုထားတာပါ။
လွန်ခဲ့တဲ့လေးနှစ်လောက်ကပေါ့လေ။ :)

အိပ်မက်နှင့်ပတ်သက်၍ ၁။
----------------------------

ကမ္ဘာပေါ်မှာ ရှိတဲ့လူတိုင်းနီးပါး အိပ်မက် မက်ဖူးကြမှာပဲ။
စိတ်ရောဂါကြီးကြီးမားမား ရှိတဲ့ လူတစ်ချို့က လွဲရင်ပေါ့။
အိပ်မက်တွေထဲမှာပါတဲ့ လူတွေအားလုံးဟာ
ခင်ဗျားတို့ ကျွန်တော်တို့ရဲ့ အပြင်လောကက လူတွေ ဖြစ်နေတတ်တယ်။
လူ့ဦးနှောက်ဟာ ရှုပ်ထွေးဆန်းကြယ်တယ်။
ဒါပေမဲ့ အိပ်မက်ထဲမှာ သရုပ်ဆောင်အသစ်တော့ ဖန်တီးမပေးနိုင်ဘူး။
ခင်ဗျားတို့ ကျွန်တော်တို့ အပြင်မှာ သိသိသာသာ ဖြစ်စေ။
အမှတ်တမဲ့ဖြစ်စေ တွေ့ဖူးကြုံဖူးတဲ့သူတွေဟာ အိပ်မက်ထဲမှာ ပါဝင်လာရအောင်
ဦးနှော်က်က ဇာတ်ညွှန်းရေးပေးလိုက်တယ်။
ဒါကြောင့် ခင်ဗျား မနက်ခင်းက လမ်းဖြတ်ကူးတဲ့အချိန်မြင်လိုက်တဲ့ ဦးလေးကြီးတစ်ယောက်ဟာလည်း
အိပ်မက်ထဲ ပါလာတတ်တာပေါ့။
ဒီတော့ အိပ်မက်ထဲမှာ ပါနေတဲ့ ခင်ဗျားမသိတဲ့လူစိမ်းဟာ အပြင်မှာ
အမှတ်တမဲ့ ဆုံဖူးတဲ့လူ ဖြစ်နေတာပေါ့။
စိတ်မ၀င်စားဘူးလား။
မကြာခင် အိပ်တော့မယ်။
ဒီနေ့ည အိပ်မက်ထဲမှာ ဘယ်သူတွေပါမှာလဲ ???

အိပ်မက်နှင့်ပတ်သက်၍ ၂။
-----------------------------
သာမန်လူတစ်ယောက်ဟာ တစ်နှစ်ကို အိပ်မက်ပေါင်း ၁၄၆၀ နဲ့ ၂၁၉၀ ခုကြားမှာ မက်လေ့ရှိသတဲ့။
တစ်နှစ်မှာ ၃၆၅ ရက်ပဲ ရှိတာ။
ဒီနှုန်းနဲ့ဆို တစ်ညကို အိပ်မက် ၅ခုလောက် မက်ရမလိုဖြစ်နေတယ်။ ဖြစ်နိုင်ပါ့မလား?
ဒါပေမယ့် တစ်ညကို အိပ်မက်တစ်ခုပဲ မက်တာရော ဟုတ်ရဲ့လား။
ကိုယ့်ကိုယ်ကို သံသယရှိရတယ်။
ပညာရှင်တွေကတော့ ကျနော်တို့ဟာ ကိုယ့်အိပ်မက်ကို ကိုယ်ပြန်မမှတ်မိတတ်ကြဘူး တဲ့။
ကျနော်တို့ မက်ခဲ့တဲ့ အိပ်မက်တွေရဲ့ ၉၅ ကနေ ၉၉ ရာခိုင်နှုန်းကို မေ့တတ်ကြစမြဲတဲ့။
တစ်ခါတစ်လေ တချို့ညတွေမှာ အိပ်မက်ထဲမှာ
ကျနော်ဟာ သေနတ်ကိုင်ပြီး ပစ်ခတ်နေရာကနေ ရုတ်တရက် စာသင်ခန်းထဲရောက်ပြီး စာသင်နေတယ်။
စာသင်ခုံမှာ မှောက်အိပ်လိုက်တာ မျက်လုံးပြန်ဖွင့်တော့ ရုပ်ရှင်ရုံထဲ ရောက်နေပြန်တယ်။
ဒါကရော...အိပ်မက်တစ်ခုကနေတစ်ခုကို ပြောင်းတာလား။
အိပ်မက်တစ်ခုထဲအတွင်းမှာပဲ ပြောင်းလဲနေတာလား သိချင်မိ။
ပညာရှင်တွေကတော့ အသက်၁၀နှစ်အထက်လူတွေဟာ တစ်ညကို အိပ်မက် ၄ခုကနေ ၆ခုထိ မက်တတ် ကြတယ်တဲ့။
ဒီနေ့ညမှာ ...အိပ်မက်ဘယ်နှစ်ခုမက်မိမှာပါလိမ့်။

အိပ်မက်နှင့်ပတ်သက်၍ ၃။
----------------------------
Inception ဇာတ်ကားထဲမှာ...
လီယိုနာဒိုနဲ့ သူ့အပေါင်းအပါတွေဟာ အိပ်မက်ကို လိုသလို ဒီဇိုင်းဆွဲ၊ လိုသလို ထိန်းချုပ်နိုင်ကြတယ်။
ဟိုတစ်နေ့က ကြည့်ရတဲ့ Divergent စိတ်ကူးယဉ်ခေတ်လွန်ကားထဲမှာ မင်းသားက မင်းသမီးကို
အိပ်မက်ကို ထိန်းချုပ်နိုင်ဖို့ သင်ပေးနေတယ်။
တကယ့်ဘ၀မှာရော...အိပ်မက်ကို ထိန်းချုပ်နိုင်ဖို့ ဆိုတာ ဖြစ်နိုင်ပါ့မလား?
ကျနော်တို့ အိပ်မက်ဆိုးတွေမက်တယ်။ သာမန်အိပ်မက်တွေ မက်တယ်။
အဲ့ဒါတွေကို ပြောင်းလဲ ထိန်းချုပ်နိုင်ဖို့ဟာ လွယ်ကူပါ့မလား။
အိပ်မက်ကို ထိန်းချုပ်နိုင်ဖို့ ကြိုးစားတဲ့နည်းကို Lucid Dreaming လို့ခေါ်တယ်။
လွယ်လွယ်ကူကူမဟုတ်ပေမယ့် ကြိုးစားရင်ရနိုင်တယ်လို့ ဆိုတယ်။
အိပ်မက်ဆိုးတစ်ခုကနေ သာယာလှပတဲ့အိပ်မက်လေးတစ်ခုသို့ပေါ့။
တချို့နိုင်ငံခြား website တွေက ခင်ဗျားကို online ကနေပြီး Lucid Dreaming Method သင်ပေးနိုင်တယ် လို့တောင် ကြော်ငြာကြတယ်။
အိပ်မက်ဆိုးတစ်ခုကို ထိန်းချုပ်နိုင်ဖို့ဆို အရေးကြီးတာတစ်ခုက အဲ့ဒီထဲမှာ မျောမနေဖို့ပဲ။
ဒါက အိပ်မက်တစ်ခုပါကွာ လို့ အိပ်မက်ထဲမှာ ခင်ဗျားနားလည်လိုက်တာနဲ့
အဲ့ဒီအိပ်မက်ဟာ ခင်ဗျားရေးတဲ့ ဇာတ်လမ်းဖြစ်လာတော့မှာပဲ။
ကြားရတာ ပျော်စရာမကောင်းဘူးလား။
မြန်မြန်အိပ်မှပါ။

အိပ်မက်နှင့်ပတ်သက်၍ ၄။
----------------------------
Salvador Dali ဆို တော်တော်များများ သိကြမယ်ထင်တယ်။
တချို့က ဒါလီကို ဆူရီရယ်လစ်ပန်းချီပညာရဲ့ ထိပ်တန်းပန်းချီဆရာလို့ တင်စားကြတယ်။
ဒါလီဟာ သူ့ရဲ့ ဆူရီရယ်လစ်ဆန်တဲ့ juxtaposition, disposition, morphing နည်းတွေကိုသုံးပြီး
ပန်းချီဆွဲတယ်လို့ ဆိုတယ်။
သူ့ပန်းချီကားတွေရဲ့ တမူထူးခြားတဲ့ ဟန်ပန်တွေကြောင့် ဒါတွေကို သူဘယ်လိုဆွဲသလဲ စဉ်းစားစရာ
ဖြစ်လာတယ်။
ဒါလီရဲ့ သူမတူတဲ့နည်းက အိပ်ငိုက်နေရာကနေ ရုတ်တရက်ထပြီး ပန်းချီဆွဲဖို့ ကြိုးစားတာလို့ ပြော ကြတယ်။
ဒါလီက သူ အိပ်မယ့်ထိုင်ခုံရဲ့ ဘေးကြမ်းပြင်မှာ သံပန်းကန်ပြားတစ်ချပ် ချထားတယ်။
သံပန်းကန်ပြားအပေါ်တည့်တည့်မှာ ဇွန်းတစ်ချောင်းကို လက်ကကိုင်ပြီးမှ အိပ်တယ်။
သူ အိပ်ပျော်သွားတဲ့အချိန်မှာ လက်ထဲက ဇွန်းက သံပန်းကန်ပေါ် ပြုတ်ကျတယ်။
ဆူညံတဲ့ အသံကြောင့် သူ လန့်နိုးလာတယ်။
ပြီးတော့ သူ လက်ရှိမက်နေတဲ့ အိပ်မက်လတ်လတ်ဆတ်ဆတ်ကိုမှ စိတ်ကူးနဲ့ပေါင်းစပ်ရေးဆွဲတယ်။
မသိစိတ်ထဲက အတွေးစိတ်ကူးတွေကို သိစိတ်ဥာဏ်နဲ့
ပေါင်းစပ်ဖန်တီးခြင်းဖြင့် ထူးခြားပြောင်မြောက်တဲ့ပန်းချီကားတွေကို ရလာတယ်လို့ ဆိုကြတယ်။
အံ့သြစရာပဲ။
ဟုတ်မဟုတ်သေချာမသိရပေမယ့် အိပ်မက်ကို လက်တွေ့အသုံးချနိုင်သူတစ်ယောက်ပေါ့။
ကောင်းသောညပါ။

အိပ်မက်နှင့်ပတ်သက်၍ ၅။
----------------------------
၂၀၀၈ ခုနှစ်က ထုတ်ပြန်တဲ့ စစ်တမ်းတစ်ခုအရ အသက်၂၅နှစ်အောက် လူတွေထဲက တချို့က
အဖြူအမည်းအိပ်မက်တွေကို တစ်ခါတစ်ရံ မက်တတ်ကြတယ်လို့ တွေ့ရှိရပါတယ်။
၁၂ ရာခိုင်နှုန်းသောသူတွေဟာ အိပ်မက်ကို အဖြူအမည်းမက်တတ်ကြပါသတဲ့။
စဉ်းစားစရာပဲ။
ကျနော့်အိပ်မက်သက်တမ်းတစ်လျှောက်မှာ အဖြူအမည်းအိပ်မက်ကို မက်ဖူးခဲ့သလား???
ဘယ်လိုမှ ပြန်တွေးမရ။
ရှေ့လျှောက်ရော အဖြူအမည်းအိပ်မက်ကို မက်ဖြစ်ပါ့မလား။
တစ်လက်စတည်း စဉ်းစားမိတာကတော့
မွေးကတည်းက အမြင်အာရုံချို့တဲ့သူတွေကရော အိပ်မက်မက်တတ်ကြပါသလား
မက်ရင်ရော အိပ်မက်ကို ဘယ်လိုအရောင်နဲ့ မက်ကြပါသလဲ???

နရီမင်းထက်။
၂၀၁၄
Ref: Internet.